II.
1560, Aug. 24.—Concerning the Jurisdictioun and Authoritie of the Bischope of Rome, called the Paip.
The thre Estaitis, then being present, vnderstanding that the jurisdictioune ande autoritie of the Bischope of Rome, callit the Paip, vsit within this realme in times bipast, hes bene verray hurtfull and preiudiciall to our Soueranis autoritie and commone weill of this realme: Thairfoir hes statute ande ordanit that the Bischope of Rome haif na jurisdictioun nor autoritie within this realme in tymes cuming. And that nane of oure saidis Soueranis subiects of this realme sute or desire in ony tyme heireftir title or rycht be the said Bischope of Rome, or his sait to ony thing within this realme, vnder the panis of Barratrye—that is to say, proscriptioune, banischement, and neuir to bruke honour, office nor dignitie within this realme. And the controvenaris heirof to be callit befoir the Justice or his Deputis, or before the Lordis of Sessioun, and pvnist thairfoir, conforme to the lawis of this realme. And the furnissaris of thame with fynance of money and purchessaris of thair title of rycht, or manteanaris or defendaris of thame, sall incur the same panis. Ande that na Bischop nor vther Prelat of this realme vse ony jurisdictioun in tymes to cum be the said Bischop of Romeis autoritie vnder the pane foirsaide.[8]
III.
1560, August 24.—Anent the Abolition of Idolatrie, and all Actis contrair to the Confession of Faith publist in this Parliament.
Forsameikile as thair hes bene diuers and sindrie actis of Parliament maide in King James the first, secunde, thirde, ferde, and fyftis tymes, Kingis of Scotlande for the tyme, ande als in our Souerane Ladeis tyme, not aggreing with Goddis holie worde. And be thame diuers personis tuke occasioune of mantenance of idolatrie and superstitioune in the kirk of Gode, ande repressing of sic personis as were professouris of the said worde, quhairthrow diuers innocentis dide suffir; for eschewing of sic in time cuming, the thre Estaites of Parliament hes annullit ande declarit all sik actis maide in tymes bipast, not aggreing with Goddis worde, ande now contrair to the Confessioune of oure Fayth, according to the saide worde publist in this Parliament, to be of nane avale, force, nor effecte. And decernis the saidis actis and euery ane of thame to haue na effecte nor strenth in tyme to cum, bot the samyn to be abolishit and extincte for euir, insafer as ony of the saidis actis ar repugnant ande contrarie to the Confessioune and word of Gode foirsaidis, ratifiit ande apprevit be the saidis Estaitis in this present Parliament.[9]
IV.
1560, Aug. 24.—Anent the Abolitioun of the Messe.
Forasmeikle as Almichtie God, be his maist trew and blessit Word, hes declarit the reuerence and honor quhilk suld be gevin to him, and be his Sone Jesus Christ, hes declarit the trew vse of the sacraments, willing the same to be vsit according to his will and Word; Be the whilk it is notoure and perfitelie knawin that the sacramentis of baptisme, and of the body and blude of Jesus Chryst, hes bene in all tymes bipast corruptit be the papistical kirk and be their ministeris. And presentlie, notwithstanding the reformatioun already maid according to Goddis Word, ʒit, nottheless, thair is sum of the same papis kirk that stubbornlie perseueris in thair wickit idolatrie, sayand mess and baptizand, conforme to the papis kirk, prophanand thairthrow the sacramentis foirsaid in quiet and secreit places; regardand thairthrow nather God nor his holie Word. Thairfoir, it is statute and ordanit in this present Parliament, that na maner of persone or personis, in ony tymes cuming, administrat ony of the sacramentis foirsaids secreitlie, or in any vther maner of way bot thai that ar admittit, and havand power to that effect; and that na maner of personis say mess, nor ʒit heir mess, nor be present thairat, vnder the pane of confiscatioun of all thair guds, movable and vnmovable, and pvneissing of thair bodeis at the discretioun of the magistrat, within quhais jurisdictioun sik personis happynis to be apprehendit ffor the first falt, Banissing the realme for the second, Justifying to the deed for the third falt. And ordainis all shreffis, stewartis, baillies, and thair deputis, provestis and baillies of burrowis, and vtheris jugeis quhatsumever, within this realme, to tak diligent sute and inquisitioun within thair bounds, quhair any sik vsurpit ministrie is vsit, mess saying, or thai that beis present at the doing thairof: Ratifyand and approvand the samyn, and tak and apprehend thame, to the effect that the panis abovewritten may be execut vpoun thame.
V.