A.
Scott's Minstrelsy, III, 235, ed. 1803; ed. 1833, II, 353. Made up from two copies obtained from recitation.
1
Erlinton had a fair daughter;
I wat he weird her in a great sin;
For he has built a bigly bower,
An a' to put that lady in.
2
An he has warnd her sisters six,
An sae has he her brethren se'en,
Outher to watch her a' the night,
Or else to seek her morn an een.
3
She hadna been i that bigly bower
Na not a night but barely ane,
Till there was Willie, her ain true love,
Chappd at the door, cryin 'Peace within!'
4
'O whae is this at my bower door,
That chaps sae late, nor kens the gin?'
'O it is Willie, your ain true love,
I pray you rise an let me in!'
5
'But in my bower there is a wake,
An at the wake there is a wane;
But I'll come to the green-wood the morn,
Whar blooms the brier, by mornin dawn.'
6
Then she's gane to her bed again,
Where she has layen till the cock crew thrice,
Then she said to her sisters a',
'Maidens, 't is time for us to rise.'
7
She pat on her back her silken gown,
An on her breast a siller pin,
An she's tane a sister in ilka hand,
An to the green-wood she is gane.