11
Thomas laye and sawe þat syghte,
Vndir-nethe ane semly tree;
He sayd, ȝone es Marye, moste of myghte,
Þat bare þat childe þat dyede for mee.
12
Bot if I speke with ȝone lady bryghte,
I hope myne herte will bryste in three;
Now sall I go with all my myghte,
Hir for to mete at Eldoune tree.
13
Thomas rathely vpe he rase,
And he rane ouer þat mountayne hye;
Gyff it be als the storye sayes,
He hir mette at Eldone tree.
14
He knelyde downe appone his knee,
Vndir-nethe þat grenwode spraye,
And sayd, Lufly ladye, rewe one mee,
Qwene of heuene, als þou wele maye!
15
Then spake þat lady milde of thoghte:
Thomas, late swylke wordes bee;
Qwene of heuene ne am I noghte,
Ffor I tuke neuer so heghe degre.
16
Bote I ame of ane oþer countree,
If I be payrelde moste of pryse;
I ryde aftyre this wylde fee;
My raches rynnys at my devyse.'
17
'If þou be parelde moste of pryse,
And here rydis thus in thy folye,
Of lufe, lady, als þou erte wyse,
Þou gyffe me leue to lye the bye.'
18
Scho sayde, þou mane, þat ware folye;
I praye þe, Thomas, þou late me bee;
Ffor I saye þe full sekirlye,
Þat synne will fordoo all my beaute.
19
'Now, lufly ladye, rewe one mee,
And I will euer more with the duelle;
Here my trouthe I will the plyghte,
Whethir þou will in heuene or helle.'
20
'Mane of molde, þou will me marre,
But ȝitt þou sall hafe all thy will;
And trowe it wele, þou chewys þe werre,
Ffor alle my beaute will þou spylle.'