6 'Be Cryst, I dare nott, for my dame,
To dele with hym þat I doo nott knowe;
For soo I myght dyspyse my name;
Therfore the crow shall byte yow.'
7 He toke hur abowte the mydell small,
That was soo faire of hyde and hewe;
He kyssed hur cheke as whyte as whall,
And prayed hur þat she wolde vpon hym rewe.
8 She scornyd hym, and callyd hym Hew;
His loue was as a paynted blowe:
'To-day me, to-morowe a newe;
Therfore the crow shall byte yow.'
9 He toke hur abowte the mydell small,
And layd hur downe vpon the grene;
Twys or thrys he served hur soo withall,
He wolde nott stynt yet, as I wene.
10 'But sythe ye haue i-lyen me bye,
Ye wyll wedde me now, as I trowe:'
'I wyll be aduysed, Gyll,' sayd he,
'For now the pye hathe peckyd yow.'
11 'But sythe ye haue i-leyn me by,
And brought my body vnto shame,
Some of your good ye wyll part with me,
Or elles, be Cryst, ye be to blame.'
12 'I wylbe aduysed,' he sayde;
'Þe wynde ys wast Þat thow doyst blowe;
I haue a-noder þat most be payde;
Therfore the pye hathe pecked yow.'
13 'Now sythe ye haue i-leyn me bye,
A lyttle thyng ye wyll tell;
In case that I with chylde be,
What ys your name? Wher doo ye dwell?'
14 'At Yorke, at London, at Clerkenwell,
At Leycester, Cambryge, at myrye Brystowe;
Some call me Rychard, Robart, Jacke, and Wyll;
For now the pye hathe peckyd yow.
15 'But, all medons, be ware be rewe,
And lett no man downe yow throwe;
For and yow doo, ye wyll ytt rewe,
For then Þe pye wyll pecke yow.'