10 He gae her rings to her fingers,
Sae did he ribbons to her hair;
He gae her a broach to her briest-bane,
For fear that they sud neer meet mair.
11 She put her hand in her pocket,
An she took out a lang, lang wand;
'As lang's ony man this wand sall keep,
There sall not a drap o his blude be drawn.'
12 Whan een was come, an een-bells rung,
An a' man boun for bed,
There beheld him Sir Colin,
Fast to the Orlange hill he rade.
13 The wind blew trees oot at the rutes,
Sae did it auld castles doon;
'T was eneuch to fricht ony Christian knicht,
To be sae far frae ony toon.
14 He rade up, sae did he doon,
He rade even through the loan,
Till he spied a knicht, wi a ladie bricht,
Wi a bent bow intil his han.
15 She cried afar, ere she cam naur,
I warn ye, kind sir, I rede ye flee;
That for the love you bear to me,
I warn ye, kind sir, that ye flee.
16 They faucht up, sae did they doon,
They faucht even through the loan,
Till he cut aff the king's richt han,
Was set aboot wi chains a' goud.
17 'Haud your hand now, Sir Colin,
I wat you've dung my love richt sair;
Noo for the love ye bear to me,
See that ye ding my love nae mair.'
18 He wooed, he wooed that fair Janet,
He wooed her and he brocht her hame;
He wooed, he wooed that fair Janet,
An ca'd her Dear-Coft till her name.