37 'Win up, win up, now Sweet Willie,
At my bidding to be,
And speak some comfort to the maid,
That's dreed sae much for thee.'
38 He is to the stable door gane,
As fast as gang coud he;
'O open, O open, Burd Helen,' he says,
'Ye'll open the door to me.'
39 'That was never my mother's custom,
And hope it's never be mine,
A knight into her companie,
When she drees a' her pine.'
40 'O open the door, Burd Helen,' he says,
'O open the door to me;
For as my sword hangs by my gair,
I'll gar it gang in three.'
41 'How can I open, how shall I open,
How can I open to thee,
When lying amang your great steed's feet,
Your young son on my knee?'
42 He hit the door then wi his foot,
Sae did he wi his knee,
Till doors o deal, and locks o steel,
In splinders gart he flee.
43 'An asking, asking, Sweet Willie,
An asking ye'll grant me;
The warst in bower in a' your towers,
For thy young son and me.'
44 'Your asking's nae sae great, Burd Helen,
But granted it shall be;
The best in bower in a' my towers,
For my young son and thee.'
45 'An asking, asking, sweet Willie,
An asking ye'll grant me;
The warst an woman about your bowers,
To wait on him and me.'
46 'The best an woman about my bowers,
To wait on him and thee,
And that's my sister Dow Isbel,
And a gude woman is she.