20 'It's surely to my bowr-woman;
It neir could be to me:'
'I brocht it to Lord Barnard's lady;
I trow that ye be she.'
21 Then up and spack the wylie nurse,
The bairn upon hir knee:
'If it be cum frae Gill Morice,
It's deir welcum to mee.'
22 'Ye leid, ye leid, ye filthy nurse,
Sae loud's I heire ye lee;
I brocht it to Lord Barnard's lady;
I trow ye be nae shee.'
23 Then up and spack the bauld baron,
An angry man was hee;
He's tain the table wi his foot,
Sae has he wi his knee,
Till siller cup and ezar dish
In flinders he gard flee.
24 'Gae bring a robe of your cliding,
That hings upon the pin,
And I'll gae to the gude grene-wode,
And speik wi your lemman.'
25 'O bide at hame, now, Lord Barnard,
I warde ye bide at hame;
Neir wyte a man for violence
That neir wate ye wi nane.'
26 Gil Morice sate in gude grene-wode,
He whistled and he sang:
'O what mean a' the folk coming?
My mother tarries lang.'
27 The baron came to the grene-wode,
Wi mickle dule and care,
And there he first spied Gill Morice,
Kameing his yellow hair.
28 'Nae wonder, nae wonder, Gill Morice,
My lady loed thee weel;
The fairest part of my body
Is blacker than thy heel.
29 'Yet neir the less now, Gill Morice,
For a' thy great bewty,
Ye's rew the day ye eir was born;
That head sall gae wi me.'