O sair, sair did we greet, and muckle did we say;
We took but ae kiss, and I bad him gang away;
I wish that I were dead, but I'm no like to dee;
And why was I born to say, Wae's me!
I gang like a ghaist, and I carena to spin;
I daurna think on Jamie, for that wad be a sin;
But I'll do my best a gude wife aye to be,
For auld Robin Gray he is kind unto me.
Lady A. Lindsay.
CXCIII
DUNCAN GRAY
Duncan Gray cam here to woo,
Ha, ha, the wooing o't;
On blythe Yule night when we were fou,
Ha, ha, the wooing o't:
Maggie coost her head fu' high,
Look'd asklent and unco skeigh,
Gart poor Duncan stand abeigh;
Ha, ha, the wooing o't!
Duncan fleech'd, and Duncan pray'd;
Meg was deaf as Ailsa Craig;
Duncan sigh'd baith out and in,
Grat his een baith bleer't and blin',
Spak o' lowpin ower a linn!
Time and chance are but a tide,
Slighted love is sair to bide;
Shall I, like a fool, quoth he,
For a haughty hizzie dee?
She may gae to—France for me!
How it comes let doctors tell,
Meg grew sick—as he grew well;
Something in her bosom wrings,
For relief a sigh she brings;
And O, her een, they spak sic things!