A cart-load, lo, their stomachs steal,
Yet swear they can not make a meal.
I like not the blue-devil-hunting crew!
I hate to drop the discontented jaw!
O let me Nature's simple smile pursue,
And pick even pleasure from a straw.
ADDRESS TO THE TOOTHACHE.
WRITTEN WHEN THE AUTHOR WAS GRIEVOUSLY TORMENTED BY THAT DISORDER. ROBERT BURNS.
My curse upon thy venom'd stang,
That shoots my tortur'd gums alang;
And thro' my lugs gies mony a twang,
Wi' gnawing vengeance;
Tearing my nerves wi' bitter pang,
Like racking engines!
When fevers burn, or ague freezes,
Rheumatics gnaw, or cholic squeezes;
Our neighbors' sympathy may ease us,
Wi' pitying moan;
But thee—thou hell o' a' diseases,
Aye mocks our groan!
A down my beard the slavers trickle!
I kick the wee stools o'er the mickle,
As round the fire the giglets keckle,
To see me loup;
While, raving mad, I wish a heckle
Were in their doup.
O' a' the num'rous human dools,
Ill har'sts, daft bargains, cutty-stools,
Or worthy friends rak'd i' the mools,
Sad sight to see!
The tricks o' knaves, or fash o' fools,
Thou bear'st the gree.
Where'er that place be priests ca' hell,
Whence a' the tones o' mis'ry yell,
And ranked plagues their numbers tell,
In dreadfu' raw,
Thou, Toothache, surely bear'st the bell,
Amang them a';
O thou grim mischief-making chiel,
That gars the notes of discord squeel,
'Till daft mankind aft dance a reel
In gore a shoe-thick;—
Gie a' the faes o' Scotland's weal
A towmond's Toothache!