Reverendissimus Dominus Patritius Durcan Episcopus Achadensis in Hibernia exponens in sibi concredita Dioecesi a tempore immemorabili viguisse cultum Sanctae Attractae Virginis inter Sancti Patritii alumnas adnumeratae, a Sanctissimo Domino Nostro PIO PAPA IX. humillime postulavit ut, die XI. Augusti Sanctae Attractae recurrente memoria, a Clero Achadensi in Officio et Missa de communi Virginum recitari valeant cum oratione Lectiones secundi nocturni propriae, uti supra adnotantur, ex probatis legitimisque fontibus desumptae. Sanctitas porro Sua, referente subscripto Sacrorum Rituum Congregationis Secretario precibus clementer annuere dignata est; dummodo Festum Sanctae Attractae instituatur ritu duplici minori, Rubricae serventur, ac interim Episcopus Orator efficaci adhibita pastorali sollicitudine Fideles cohortari et excitare curet ad instaurandam in oppido Killareti Ecclesiam Sanctae Attractae solo aequatam, quo opere completo, preces iterari debent ad implorandam pro clero ejusdem oppidi elevationum ritus in Festo Sanctae Attractae. Contrariis non obstantibus quibuscumque.
Die 28 Julii 1864.
Locus ✠ SIGILLI
C. Episcopus Portuen. et S. Rufinae
Card. Patrizi S. R. C. Praef.
D. Bartolini, S. R. C. Secretarius.
DIE XI. AUGUSTI IN FESTO SANCTAE ATTRACTAE, VIRGINIS, DUPLEX.
Oratio.—Deus humilium fortitudo, qui ad promovendam inter paganos fidem, beatam Attractam Virginem tuam verbis et miraculis potentem effecisti, præsta ut cujus patrocinio juvamur in terris, ejus societatem consequamur in cœlis. Per Dominum, etc.
IN SECUNDO NOCTURNO.
Lectio IV.—Hibernia, Sanctorum insula, divina virtute fecundata, vix orto fidei sole, innumera germina sanctitatis protulit. Imprimis vero castitatis liliis exornata est, unde et illustre Apostoli sui Patritii elogium promeruit: Quomodo, inquit, tota insula plebs Domini effecta est, et filii ejus ac filiæ Monachi et Virgines Christi esse videntur, et jam recenseri vix potest earum numerus quae improperia parentum ac persecutiones hilari animo sustinentes totas se religioni et Christo voverunt. Inter quas Patritii alumnas se virginum choro adjunxit Sancta Attracta, quae in Ultonia nobili genere nata est sed a prima ætate pompas ac divitias respuens saeculo renuntiavit, et vanitates hujus mundi nihili esse duxit ut Christi sponsa esse mereretur.
Lectio V.—Nondum adulta nobile certamen adversus Satanam ejusque illecebras inivit et votum castitatis emisit. Ut autem divinis rebus liberius vacaret, natale solum deserens fines Connaciæ petiit, ibique orationibus et jejuniis vacans tota in pietatis exercitia et virtutis studium incubuit. Hospitalitatis quoque gratia enituit et seipsam suasque opes in sublevandis indigentium miseriis alacriter impendit. Pauperes et ægrotos undequaque accedentes Christi charitate amplexa est et eosdem tum terrena ope sublevavit tum veris fidei thesauris divites effecit. Plures quoque ab iniquitatis semitis ad justitiæ legem convertit et a servitute idolorum adduxit ad colendum Dominum ac Deum Jesum Christum, immo miraculorum gloria illustris ejus sanctitatis fama longe lateque per totam insulam pervulgata est.
Lectio VI.—Inter innumera vero, quae a Sancta Attracta mire patrata narrantur, insigne imprimis miraculum est quo territorium Lugniae in provincia Connaciæ ab horrendo monstro liberavit. Tota siquidem illa regio belluæ hujus feritate devastata est, et incolae adeo terrore perculsi sunt ut a terribili ejus aspectu ad montes et cavernas confugerent. Attractam tandem supplices rogarunt ut in tanta afflictione opem sibi et auxilium ferre dignaretur. Respondit inclyta Virgo: potens est Deus, qui mundum ex nihilo creavit et hominem de limo terrae ad suam imaginem plasmavit, etiam regionem istam de tanta peste omnino liberare. Tunc genua flectens omni fiducia Deum precabatur: Antequam vero suis precibus finem apposuit, jam exauditæ sunt apud Dominum, et sæva bellua rugitus emittens et torvo collo in ipsam Sanctam irruens divina virtute interiit.