Air—"Loch Erroch Side."
'Twas on a summer's afternoon,
A wee afore the sun gaed down,
A lassie, wi' a braw new gown,
Cam' ower the hills to Gowrie.
The rose-bud, wash'd in summer's shower,
Bloom'd fresh within the sunny bower;
But Kitty was the fairest flower
That e'er was seen in Gowrie.
To see her cousin she cam' there,
An', oh, the scene was passing fair!
For what in Scotland can compare
Wi' the Carse o' Gowrie?
The sun was setting on the Tay,
The blue hills melting into gray;
The mavis' and the blackbird's lay
Were sweetly heard in Gowrie.
Oh, lang the lassie I had woo'd!
An' truth and constancy had vow'd,
But cam' nae speed wi' her I lo'ed,
Until she saw fair Gowrie.
I pointed to my faither's ha',
Yon bonnie bield ayont the shaw,
Sae loun' that there nae blast could blaw;
Wad she no bide in Gowrie?
Her faither was baith glad and wae;
Her mither she wad naething say;
The bairnies thocht they wad get play
If Kitty gaed to Gowrie.
She whiles did smile, she whiles did greet,
The blush and tear were on her cheek;
She naething said, an' hung her head;
But now she's Leddy Gowrie.
THERE GROWS A BONNIE BRIER BUSH.[56]
There grows a bonnie brier bush in our kail-yard,
And white are the blossoms o't in our kail-yard,
Like wee bit white cockauds to deck our Hieland lads,
And the lasses lo'e the bonnie bush in our kail-yard.
An' it 's hame, an' it 's hame to the north countrie,
An' it 's hame, an' it 's hame to the north countrie,
Where my bonnie Jean is waiting for me,
Wi' a heart kind and true, in my ain countrie.
"But were they a' true that were far awa?
Oh! were they a' true that were far awa'?
They drew up wi' glaikit Englishers at Carlisle Ha',
And forgot auld frien's that were far awa.