Now simmer decks the fields wi' flowers,
The woods wi' leaves so green,
An' little burds around their bowers
In harmony convene;
The cuckoo flees frae tree to tree,
While saft the zephyrs blaw,
But what are a' thae joys to me,
When Jockie 's far awa'?
When Jockie 's far awa' on sea,
When Jockie 's far awa';
But what are a' thae joys to me,
When Jockie 's far awa'?
Last May mornin', how sweet to see
The little lambkins play,
Whilst my dear lad, alang wi' me,
Did kindly walk this way!
On yon green bank wild flowers he pou'd,
To busk my bosom braw;
Sweet, sweet he talk'd, and aft he vow'd,
But now he 's far awa'.
But now, &c.
O gentle peace, return again,
Bring Jockie to my arms,
Frae dangers on the raging main,
An' cruel war's alarms;
Gin e'er we meet, nae mair we 'll part
While we hae breath to draw;
Nor will I sing, wi' aching heart,
My Jockie 's far awa';
My Jockie 's far awa,' &c.
MAGGIE AN' ME.
Air—"The Banks o' the Dee."
The sweets o' the simmer invite us to wander
Amang the wild flowers, as they deck the green lea,
An' by the clear burnies that sweetly meander,
To charm us, as hameward they rin to the sea;
The nestlin's are fain the saft wing to be tryin',
As fondly the dam the adventure is eyein',
An' teachin' her notes, while wi' food she 's supplyin'
Her tender young offspring, like Maggie an' me.
The corn in full ear, is now promisin' plenty,
The red clusterin' row'ns bend the witch-scarrin' tree,
While lapt in its leaves lies the strawberry dainty,
As shy to receive the embrace o' the bee.
Then hope, come alang, an' our steps will be pleasant,
The future, by thee, is made almost the present;
Thou frien' o' the prince an' thou frien' o' the peasant,
Thou lang hast befriended my Maggie an' me.
Ere life was in bloom we had love in our glances,
An' aft I had mine o' her bonnie blue e'e,
We needit nae art to engage our young fancies,
'Twas done ere we kent, an' we own't it wi' glee.
Now pleased, an' aye wishin' to please ane anither,
We 've pass'd twenty years since we buckled thegither,
An' ten bonnie bairns, lispin' faither an' mither,
Hae toddled fu' fain atween Maggie an' me.