Ah, Peggie! since thou 'rt gane away,
An' left me here to languish,
I canna fend anither day
In sic regretfu' anguish.
My mind 's the aspen i' the vale,
In ceaseless waving motion;
'Tis like a ship without a sail,
On life's unstable ocean.
I downa bide to see the moon
Blink owre the glen sae clearly;
Aince on a bonnie face she shone—
A face that I lo'ed dearly!
An' when beside yon water clear,
At e'en I 'm lanely roaming,
I sigh an' think, if ane was here,
How sweet wad fa' the gloaming!
When I think o' thy cheerfu' smile,
Thy words sae free an' kindly,
Thy pawkie e'e's bewitching wile,
The unbidden tear will blind me.
The rose's deepest blushing hue
Thy cheek could eithly borrow,
But ae kiss o' thy cherry mou'
Was worth a year o' sorrow.
Oh! in the slippery paths of love,
Let prudence aye direct thee;
Let virtue every step approve,
An' virtue will respect thee.
To ilka pleasure, ilka pang,
Alak! I am nae stranger;
An' he wha aince has wander'd wrang
Is best aware o' danger.
May still thy heart be kind an' true,
A' ither maids excelling;
May heaven distil its purest dew
Around thy rural dwelling.
May flow'rets spring an' wild birds sing
Around thee late an' early;
An' oft to thy remembrance bring
The lad that loo'd thee dearly.
GANG TO THE BRAKENS WI' ME.
I 'll sing of yon glen of red heather,
An' a dear thing that ca's it her hame,
Wha 's a' made o' love-life thegither,
Frae the tie o' the shoe to the kaime,
Love beckons in every sweet motion,
Commanding due homage to gie;
But the shrine o' my dearest devotion
Is the bend o' her bonny e'ebree.
I fleech'd an' I pray'd the dear lassie
To gang to the brakens wi' me;
But though neither lordly nor saucy,
Her answer was—"Laith wad I be!
I neither hae father nor mither,
Sage counsel or caution to gie;
An' prudence has whisper'd me never
To gang to the brakens wi' thee."
"Dear lassie, how can ye upbraid me,
An' try your ain love to beguile?
For ye are the richest young lady
That ever gaid o'er the kirk-stile.
Your smile that is blither than ony,
The bend o' your cheerfu' e'ebree,
An' the sweet blinks o' love there sae bonny,
Are five hunder thousand to me!"