THROUGH CROCKSTON CASTLE'S LANELY WA'S.[82]
Air—"Crockston Castle."
Through Crockston Castle's lanely wa's
The wintry wind howls wild and dreary;
Though mirk the cheerless e'ening fa's,
Yet I hae vow'd to meet my Mary.
Yes, Mary, though the winds should rave
Wi' jealous spite to keep me frae thee,
The darkest stormy night I 'd brave,
For ae sweet secret moment wi' thee.
Loud o'er Cardonald's rocky steep,
Rude Cartha pours in boundless measure;
But I will ford the whirling deep,
That roars between me and my treasure.
Yes, Mary, though the torrent rave,
Wi' jealous spite, to keep me frae thee,
Its deepest flood I 'd bauldly brave,
For ae sweet secret moment wi' thee.
The watch-dog's howling loads the blast,
And makes the nightly wand'rer eerie;
But when the lonesome way is past,
I 'll to this bosom clasp my Mary!
Yes, Mary, though stern winter rave,
With a' his storms, to keep me frae thee,
The wildest dreary night I 'd brave,
For ae sweet secret moment wi' thee.
THE BRAES O' BALQUHITHER.[83]
Air—"The Three Carls o' Buchanan."
Let us go, lassie, go
To the braes o' Balquhither,
Where the blaeberries grow
'Mang the bonnie Highland heather;
Where the deer and the rae,
Lightly bounding together,
Sport the lang summer day
On the braes o' Balquhither.
I will twine thee a bower
By the clear siller fountain,
And I 'll cover it o'er
Wi' the flowers o' the mountain;
I will range through the wilds,
And the deep glens sae dreary,
And return wi' their spoils
To the bower o' my dearie.