Far ben thy dark green plantin's shade,
The cooshat croodles am'rously,
The mavis, down thy bughted glade,
Gars echo ring frae every tree.
Thou bonny wood, &c.
Awa, ye thoughtless, murd'ring gang,
Wha tear the nestlings ere they flee!
They 'll sing you yet a canty sang,
Then, O, in pity, let them be!
Thou bonny woods, &c.
When winter blaws in sleety showers,
Frae aff the norlan' hills sae hie,
He lightly skiffs thy bonny bowers,
As laith to harm a flower in thee.
Thou bonny wood, &c.
Though Fate should drag me south the line,
Or o'er the wide Atlantic sea;
The happy hours I 'll ever mind,
That I, in youth, hae spent in thee.
Thou bonny wood, &c.
GOOD NIGHT, AND JOY.[87]
Air—"Good night, and joy be wi' you a'."
The weary sun 's gaen down the west,
The birds sit nodding on the tree;
All nature now prepares for rest,
But rest prepared there 's none for me.
The trumpet sounds to war's alarms,
The drums they beat, the fifes they play,—
Come, Mary, cheer me wi' thy charms,
For the morn I will be far away.
Good night, and joy—good night, and joy,
Good night, and joy be wi' you a';
For since its so that I must go,
Good night, and joy be wi' you a'!
I grieve to leave my comrades dear,
I mourn to leave my native shore;
To leave my aged parents here,
And the bonnie lass whom I adore.
But tender thoughts maun now be hush'd,
When danger calls I must obey.
The transport waits us on the coast,
And the morn I will be far away.
Good night, and joy, &c.