A Norland Laird neist trotted up,
Wi' bawsint naig and siller whup;
Cried—There 's my beast, lad, haud the grup,
Or tie it to a tree.
What 's gowd to me? I 've wealth o' lan',
Bestow on ane o' worth your han':
He thought to pay what he was awn
Wi' Jenny's bawbee.
A Lawyer neist, wi' bleth'rin' gab,
Wha speeches wove like ony wab;
O' ilk ane's corn aye took a dab,
And a' for a fee;
Accounts he owed through a' the toun,
And tradesmen's tongues nae mair could drown;
But now he thought to clout his goun
Wi' Jenny's bawbee.
Quite spruce, just frae the washin' tubs,
A fool came neist; but life has rubs;
Foul were the roads, and fu' the dubs,
And jaupit a' was he:
He danced up, squintin' through a glass,
And grinn'd, i' faith, a bonnie lass!
He thought to win, wi' front o' brass,
Jenny's bawbee.
She bade the laird gae kaim his wig,
The sodger not to strut sae big,
The lawyer not to be a prig;
The fool he cried, Te-hee!
I kenn'd that I could never fail!
But she pinn'd the dishclout to his tail,
And soused him frae the water-pail,
And kept her bawbee.
Then Johnnie came, a lad o' sense,
Although he had na mony pence;
And took young Jenny to the spence,
Wi' her to crack a wee.
Now Johnnie was a clever chiel',
And here his suit he press'd sae weel
That Jenny's heart grew saft as jeel,
And she birl'd her bawbee.[99]
JENNY DANG THE WEAVER.[100]
At Willie's weddin' o' the green,
The lasses, bonnie witches,
Were busked out in aprons clean,
And snaw-white Sunday mutches;
Auld Mysie bade the lads tak' tent,
But Jock wad na believe her;
But soon the fool his folly kent,
For Jenny dang the weaver.
In ilka country dance and reel
Wi' her he wad be babbin';
When she sat down, then he sat down,
And till her wad be gabbin';
Where'er she gaed, or butt or ben,
The coof wad never leave her,
Aye cacklin' like a clockin' hen,
But Jenny dang the weaver.