O dear, dear Jeanie Morrison,
The thochts o' bygane years
Still fling their shadows owre my path,
And blind my een wi' tears;
They blind my een wi' saut, saut tears;
And sair and sick I pine,
As memory idly summons up
The blithe blinks o' langsyne.
'Twas then we luvit ilk ither weel,
'Twas then we twa did part;
Sweet time—sad time! twa bairns at schule,
Twa bairns, and but ae heart!
'Twas then we sat on ae laigh bink,
To leir ilk ither lear;
And tones, and looks, and smiles were shed,
Remember'd evermair.
I wonder, Jeanie, aften yet,
When sitting on that bink,
Cheek touchin' cheek, loof lock'd in loof,
What our wee heads could think.
When baith bent doun owre ae braid page,
Wi' ae buik on our knee,
Thy lips were on thy lesson—but
My lesson was in thee.
Oh, mind ye how we hung our heads,
How cheeks brent red wi' shame,
Whene'er the schule-weans, laughin', said
We cleek'd thegither hame?
And mind ye o' the Saturdays
(The schule then skailt at noon)
When we ran aff to speel the braes—
The broomy braes o' June?
My head rins round and round about,
My heart flows like a sea,
As ane by ane the thoughts rush back
O' schule-time and o' thee.
Oh, mornin' life! oh, mornin' luve!
Oh, lichtsome days and lang,
When hinnied hopes around our hearts,
Like simmer blossoms sprang!
Oh, mind ye, luve, how aft we left
The deavin', dinsome toun,
To wander by the green burnside,
And hear its waters croon?
The simmer leaves hung owre our heads,
The flowers burst round our feet,
And in the gloamin o' the wood,
The throssil whusslit sweet.
The throssil whusslit in the wood,
The burn sang to the trees,
And we, with nature's heart in tune,
Concerted harmonies;
And on the knowe abune the burn,
For hours thegither sat
In the silentness o' joy, till baith
Wi' very gladness grat.
Aye, aye, dear Jeanie Morrison,
Tears trickled doun your cheek,
Like dew-beads on a rose, yet nane
Had ony power to speak!
That was a time, a blessed time,
When hearts were fresh and young,
When freely gush'd all feelings forth,
Unsyllabled—unsung!
I marvel, Jeanie Morrison,
Gin I hae been to thee
As closely twined wi' earliest thochts,
As ye hae been to me!
Oh, tell me gin their music fills
Thine heart, as it does mine;
Oh, say gin e'er your heart grows grit
Wi' dreamings o' langsyne?
I 've wander'd east, I 've wander'd west,
I 've borne a weary lot;
But in my wanderings, far or near,
Ye never were forgot.
The fount that first burst frae this heart,
Still travels on its way;
And channels deeper as it rins,
The luve o' life's young day.