Wi' heart sincere I love thee, Bell,
But dinna ye be saucy, O!
Or a' my love I winna tell
To thee, my black-e'ed lassie, O!
It 's no thy cheek o' rosy hue,
It 's no thy little cherrie mou';
Its a' because thy heart 's sae true,
My bonnie black-e'ed lassie, O!
It 's no the witch-glance o' thy e'e,
Though few for that surpass ye, O!
That maks ye aye sae dear to me,
My bonnie black-e'ed lassie, O!
It 's no the whiteness o' thy skin,
It 's no love's dimple on thy chin;
Its a' thy modest worth within,
My bonnie black-e'ed lassie, O!
Ye smile sae sweet, ye look sae kind,
That a' wish to caress ye, O!
But O! how I admire thy mind,
My bonnie black-e'ed lassie, O!
I 've seen thine e'en like crystal clear,
Shine dimly through soft pity's tear;
These are the charms that mak thee dear,
To me, my black-e'ed lassie, O!
GRIM WINTER WAS HOWLIN'.
Air—"Bonnie Dundee."
Grim winter was howlin' owre muir and owre mountain,
And bleak blew the wind on the wild stormy sea;
The cauld frost had lock'd up each riv'let and fountain,
As I took the dreich road that leads north to Dundee.
Though a' round was dreary, my heart was fu' cheerie,
And cantie I sung as the bird on the tree;
For when the heart 's light, the feet winna soon weary,
Though ane should gang further than bonnie Dundee!
Arrived at the banks o' sweet Tay's flowin' river,
I look'd, as it rapidly row'd to the sea;
And fancy, whose fond dream still pleases me ever,
Beguiled the lone passage to bonnie Dundee.
There, glowrin' about, I saw in his station
Ilk bodie as eydent as midsummer bee;
When fair stood a mark, on the face o' creation,
The lovely young Peggy, the pride o' Dundee!
O! aye since the time I first saw this sweet lassie,
I 'm listless, I 'm restless, wherever I be;
I 'm dowie, and donnart, and aften ca'd saucy;
They kenna its a' for the lass o' Dundee!
O! lang may her guardians be virtue and honour;
Though anither may wed her, yet well may she be;
And blessin's in plenty be shower'd down upon her—
The lovely young Peggie, the pride o' Dundee!