THE LASS O' KINTORE.
Air—"Oh, as I was kiss'd yestreen."
At hame or afield I am cheerless an' lone,
I 'm dull on the Ury, an' droop by the Don;
Their murmur is noisy, and fashious to hear,
An' the lay o' the lintie fa's dead on my ear.
I hide frae the morn, and whaur naebody sees;
I greet to the burnie, an' sich to the breeze;
Though I sich till I 'm silly, an' greet till I dee,
Kintore is the spot in this world for me.
But the lass o' Kintore, oh! the lass o' Kintore,
Be warned awa' frae the lass o' Kintore;
There 's a love-luring look that I ne'er kent afore
Steals cannily hame to the heart at Kintore.
They bid me forget her, oh! how can it be?
In kindness or scorn she 's ever wi' me;
I feel her fell frown in the lift's frosty blue,
An' I weel ken her smile in the lily's saft hue.
I try to forget her, but canna forget,
I 've liked her lang, an' I aye like her yet;
My poor heart may wither, may waste to its core,
But forget her, oh never! the lass o' Kintore!
Oh the wood o' Kintore, the holmes o' Kintore!
The love-lichtin' e'e that I ken at Kintore;
I 'll wander afar, an' I 'll never look more
On the gray glance o' Peggy, or bonnie Kintore!
MY HAMELESS HA'.
Oh! how can I be cheerie in this hameless ha'?
The very sun glints eerie on the gilded wa';
An' aye the nicht sae drearie,
Ere the dowie morn daw,
Whan I canna win to see you,
My Jamie, ava'.
Though mony miles between us, an' far, far frae me,
The bush that wont to screen us frae the cauld warl's e'e,
Its leaves may waste and wither,
But its branches winna fa';
An' hearts may haud thegither,
Though frien's drap awa'.
Ye promised to speak o' me to the lanesome moon,
An' weird kind wishes to me, in the lark's saft soun';
I doat upon that moon
Till my very heart fills fu',
An' aye yon birdie's tune
Gars me greet for you.
Then how can I be cheerie in the stranger's ha'?
A gowden prison drearie, my luckless fa'!
'Tween leavin' o' you, Jamie,
An' ills that sorrow me,
I 'm wearie o' the warl',
An' carena though I dee.