I mourn'd not the absence o' summer or spring,
Nor aught o' the beauties the seasons may bring,
E'en 'mid the dark winter this heart still was gay,
Ere Peggy, sweet Peggy, gaed far, far away.
The bleak blawing winter, wi' a' its alarms,
Might add to, but tak not away from her charms,
The snaws seem'd as welcome as summer-won hay,
Ere Peggy, sweet Peggy, gaed far, far away.
Our Henry lo'es Mary, Jock dotes upon Jean,
And Willie ca's Nancy o' beauty the queen,
But Peggy was mine, and far lovelier than they,
Ere Peggy, sweet Peggy, gaed far, far away.
Oh, when will the days o' this sadness be o'er,
And Heaven, in pity, my Peggie restore?
It kens she 's the loveliest it ere made o' clay,
And ill I may thole that she 's far, far away.
LOVE BROUGHT ME A BOUGH.
Love brought me a bough o' the willow sae green
That waves by yon brook where the wild-flowers grow sheen;
And braiding my harp wi' the sweet budding rue,
It mellow'd its tones 'mang the saft falling dew;
It whisper'd a strain that I wist na to hear,
That false was the lassie my bosom held dear;
Pride stirr'd me to sing, as I tore off the rue—
If she 's got ae sweetheart, sure I can get two!
Yet aft when reflection brings back to my mind
The days that are gane, when my lassie was kind,
A sigh says I felt then as ne'er I feel now,
My soul was enraptured—I canna tell how.
Yet what need I sing o' the joys that hae been,
And why should I start at the glance o' her een,
Or think o' the dark locks that wave o'er her brow?—
If she 's got ae sweetheart, sure I can get two!
Yestreen when the sun glinted blithe on the hill,
I met her alane by the flower-border'd rill,
I speer'd for her weelfare, but cauld was her air,
And I soughtna' to change it by foul words or fair;
She says I deceived her, how can it be sae?
The heart, ere deceived some affection maun hae,
And that hers had nane, I the sairer may rue,
Though she 's got ae sweetheart, an' I can get two.
She left me for ane wha o' mailins could sing,
Sae gie her the pleasures that riches can bring.
Gae fame to the hero, and gowd to the Jew,
And me the enjoyment that 's prized by the few;
A friend o' warm feeling, and frank and refined,
And a lassie that 's modest, true hearted, and kind,
I 'll woo her, I 'll lo'e her, and best it will do,
For love brings nae bliss when it tampers wi' two.