Air—"Bonnie House o' Airlie."
Sweetly shines the sun on auld Edinbro' toun,
And mak's her look young and cheerie;
Yet I maun awa' to spend the afternoon
At the lanesome Wells o' Wearie.
And you maun gang wi' me, my winsome Mary Grieve,
There 's nought in the world to fear ye;
For I ha'e ask'd your minnie, and she has gi'en ye leave
To gang to the Wells o' Wearie.
Oh, the sun winna blink in thy bonnie blue e'en,
Nor tinge the white brow o' my dearie,
For I 'll shade a bower wi' rashes lang and green
By the lanesome Wells o' Wearie.
But, Mary, my love, beware ye dinna glower
At your form in the water sae clearly,
Or the fairy will change you into a wee, wee flower,
And you 'll grow by the Wells o' Wearie.
Yestreen as I wander'd there a' alane,
I felt unco douf and drearie,
For wanting my Mary, a' around me was but pain
At the lanesome Wells o' Wearie.
Let fortune or fame their minions deceive,
Let fate look gruesome and eerie;
True glory and wealth are mine wi' Mary Grieve,
When we meet by the Wells o' Wearie.
Then gang wi' me, my bonnie Mary Grieve,
Nae danger will daur to come near ye;
For I ha'e ask'd your minnie, and she has gi'en ye leave,
To gang to the Wells o' Wearie.