There lives a young lassie
Far down yon lang glen,
How I lo'e that lassie
There's nae ane can ken!
Oh! a saint's faith may vary,
But faithfu' I'll be—
For weel I lo'e Mary,
And Mary lo'es me.
Red, red as the rowan
Her smiling wee mou,
An' white as the gowan
Her breast and her brow;
Wi' the foot o' a fairy
She links o'er the lea—
Oh! weel I lo'e Mary,
An' Mary lo'es me.
Where yon tall forest timmer,
An' lowly broom bower,
To the sunshine o' simmer,
Spread verdure an' flower;
There, when night clouds the cary,
Beside her I'll be—
For weel I lo'e Mary,
An' Mary lo'es me!
OH! GIN I WERE WHERE GADIE RINS.[13]
Oh! gin I were where Gadie rins,
Where Gadie rins, where Gadie rins—
Oh, gin I were where Gadie rins
By the foot o' Bennachie.
I've roam'd by Tweed, I've roam'd by Tay,
By Border Nith, and Highland Spey,
But dearer far to me than they
The braes o' Bennachie.
When blade and blossoms sprout in spring,
And bid the burdies wag the wing,
They blithely bob, and soar, and sing
By the foot o' Bennachie.
When simmer cleeds the varied scene
Wi' licht o' gowd and leaves o' green,
I fain would be where aft I've been
At the foot o' Bennachie.
When autumn's yellow sheaf is shorn,
And barn-yards stored wi' stooks o' corn,
'Tis blithe to toom the clyack horn
At the foot o' Bennachie.