OH! SAY NA YOU MAUN GANG AWA'.
Oh! say na you maun gang awa',
Oh! say na you maun leave me;
The dreaded hour that parts us twa
Of peace and hope will reave me.
When you to distant shores are gane
How could I bear to tarry,
Where ilka tree and ilka stane
Would mind me o' my Mary?
I couldna wander near yon woods
That saw us oft caressing,
And on our heads let fa' their buds
In earnest o' their blessing.
Ilk stane wad mind me how we press'd
Its half-o'erspreading heather,
And how we lo'ed the least the best
That made us creep thegither.
I couldna bide, when you are gane,
My ain, my winsome dearie,
I couldna stay to pine my lane—
I live but when I 'm near ye.
Then say na you maun gang awa',
Oh! say na you maun leave me;
For ah! the hour that parts us twa
Of life itself will reave me.