ILKA BLADE O' GRASS KEPS ITS AIN DRAP O' DEW.
Confide ye aye in Providence, for Providence is kind,
An' bear ye a' life's changes wi' a calm an' tranquil mind,
Though press'd an' hemm'd on every side, hae faith an' ye 'll win through,
For ilka blade o' grass keps its ain drap o' dew.
Gin reft frae friends, or crost in love, as whiles nae doubt ye 've been,
Grief lies deep-hidden in your heart, or tears flow frae your e'en,
Believe it for the best, and trow there 's good in store for you,
For ilka blade o' grass keps its ain drap o' dew.
In lang, lang days o' simmer when the clear and cludless sky
Refuses ae wee drap o' rain to Nature parch'd and dry,
The genial night, wi balmy breath, gaurs verdure spring anew,
An' ilka blade o' grass keps its ain drap o' dew.
Sae lest 'mid fortune's sunshine we should feel ower proud an' hie,
An' in our pride forget to wipe the tear frae poortith's e'e,
Some wee dark cluds o' sorrow come, we ken na whence or hoo,
But ilka blade o' grass keps its ain drap o' dew.
WIFIE, COME HAME.
Wifie, come hame,
My couthie wee dame!
Oh, but ye 're far awa,
Wifie, come hame!
Come wi' the young bloom o' morn on thy broo,
Come wi' the lown star o' love in thine e'e,
Come wi' the red cherries ripe on thy mou',
A' glist wi' balm, like the dew on the lea.
Come wi' the gowd tassels fringin' thy hair,
Come wi' thy rose cheeks a' dimpled wi' glee,
Come wi' thy wee step, and wifie-like air,
Oh, quickly come, and shed blessings on me!
Wifie, come hame,
My couthie wee dame!
Oh, my heart wearies sair,
Wifie, come hame!
Come wi' our love pledge, our dear little dawtie,
Clasping my neck round, an' clamb'rin' my knee;
Come let me nestle and press the wee pettie,
Gazing on ilka sweet feature o' thee.
Oh, but the house is a cauld hame without ye,
Lanely and eerie 's the life that I dree;
Oh, come awa', an' I 'll dance round about ye,
Ye 'll ne'er again win frae my arms till I dee.