The ingle cheek is bleezin' bricht,
The croozie sheds a cheerfu' licht,
An' happy hearts are here the nicht,
To haud a rantin' rockin'!
There 's laughin' Lizzie, free o' care;
There 's Mary, wi' the modest air;
An' Kitty, wi' the gowden hair,
Will a' be at the rockin'.
There 's Bessie, wi' her spinnin' wheel;
There 's Jeanie Deans, wha sings sae weel;
An' Meg, sae daft about a reel,
Will a' be at the rockin'.
The ploughman, brave as Wallace wicht;
The weaver, wi' his wit sae bricht;
The vulcan, wi' his arm o' micht,
Will a' be at the rockin'.
The shepherd, wi' his eagle e'e,
Kindly heart an' rattlin' glee;
The wonder-workin' dominie,
Will a' be at the rockin'.
The miller, wi' his mealy mou',
Wha kens sae weel the way to woo—
His faither's pipes frae Waterloo
He 'll bring to cheer our rockin'.
The souter, wi' his bristly chin,
Frae whilk the lasses screechin' rin;
The curly-headed whupper-in,
Will a' be at the rockin'.
There 's merry jokes to cheer the auld,
There 's love an' joy to warm the cauld,
There 's sangs o' weir to fire the bauld;
Sae prove our merry rockin'.
The tales they tell, the sangs they sing,
Will gar the auld clay biggin' ring,
And some will dance the Highland fling,
Right blithely at the rockin'.
Wi' wit, an' love, an' fun, an' fire,
Fond friendship will each soul inspire,
An' mirth will get her heart's desire
O' rantin', at the rockin'.