"An', lassie, I've goupins o' gowd in a stockin',
An' pearlin's wad dazzle yer e'e;
A mettl'd, but canny young yaud, for the yokin',
When ye wad gae jauntin' wi' me.
"I 'll hap ye, and fend ye, and busk ye, and tend ye,
And mak' ye the licht o' my e'e;
I 'll comfort and cheer ye, and daut ye and dear ye,
As couthy as couthy can be.
"I 've lo'ed ye, dear lassie, since first, a bit bairn,
Ye ran up the knowe to meet me;
An' deckit my bonnet wi' blue bells an' fern,
Wi' meikle glad laughin' an' glee.
"An' noo woman grown, an' mensefu', an' fair,
An' gracefu' as gracefu' can be—
Will ye tak' an' auld carle wha ne'er had a care
For woman, dear Tibby, but thee?"
Sae, Aunty, ye see I 'm a' in a swither,
What answer the bodie to gie—
But aften I wish he wad tak' my auld mither,
And let puir young Tibby abee.
JEAN LINN.
Oh, haud na' yer noddle sae hie, ma doo!
Oh, haud na' yer noddle sae hie!
The days that hae been, may be yet again seen,
Sae look na sae lightly on me, ma doo!
Sae look na' sae lightly on me!
Oh, geck na' at hame hodden gray, Jean Linn!
Oh, geck na' at hame hodden gray!
Yer gutcher an mine wad thocht themsels fine,
In cleedin' sae bein, bonnie May, bonnie May—
In cleedin' sae bein, bonnie May.
Ye mind when we won in Whinglen, Jean Linn—
Ye mind when we won in Whinglen,
Your daddy, douce carle, was cotter to mine,
An' our herd was yer bonnie sel', then, Jean Linn,
An' our herd was yer bonnie sel', then.