At hame, a-field, you 're a' my theme;
I doat my time away;
I dream o'er a' your charms by night,
And worship them by day.
But when they glad my langin' e'en,
As they are gladden'd now,
My courage flees like frighted bird;
I daurna mint to woo.
My head thus lying on your lap,
Your hand aneath my cheek;
Love stounds my bosom through and through,
But yet I canna speak.
My coward heart wi' happiness,
Wi' bliss is brimin' fu';
But, oh! its fu'ness mars my tongue,
I haena power to woo.
I prize your smile, as husbandman
The summer's opening bloom,
And could you frown, I dread it mair,
Than he the autumn's gloom.
My life hangs on that sweet, sweet lip,
On that calm, sunny brow;
And, oh! my dead hangs on them baith,
Unless you let me woo.
Oh! lift me to your bosom, then,
Lay your warm cheek to mine;
And let me round that lovesome waist
My arms enraptured twine;
That I may breathe my very soul,
In ae lang lovin' vow;
And a' the while in whispers low,
You 'll learn me, love, to woo!
I 'M WANDERING WIDE.
I 'm wand'ring wide this wintry night,
But yet my heart 's at hame,
Fu' cozie by my ain fire-cheek,
Beside my winsome dame.
The weary winds howl lang an' loud;
But 'mid their howling drear,
Words sweeter far than honey blabs
Fa' saftly on my ear.
I 'm wand'ring wide this wintry night,
I 'm wand'ring wide an' far;
But love, to guide me back again,
Lights up a kindly star.
The lift glooms black aboon my head,
Nae friendly blink I see;
But let it gloom—twa bonnie e'en
Glance bright to gladden me.
I 'm wand'ring wide this wintry night,
I 'm wand'ring wide and late,
And ridgy wreaths afore me rise,
As if to bar my gate;
Around me swirls the sleety drift,
The frost bites dour an' keen;
But breathings warm, frae lovin' lips,
Come ilka gust atween.
I 'm wand'ring wide this wintry night,
I 'm wand'ring wide an' wild,
Alang a steep and eerie track,
Where hills on hills are piled;
The torrent roars in wrath below,
The tempest roars aboon;
But fancy broods on brighter scenes,
And soughs a cheerin' tune.