When the creel o' herrin' passes,
Ladies, clad in silks and laces,
Gather in their braw pelisses,
Cast their heads, and screw their faces.
Wha 'll buy caller herrin'? &c.
Caller herrin 's no got lightlie;
Ye can trip the spring fu' tightlie;
Spite o' tauntin', flauntin', flingin',
Gow has set you a' a-singin'.
Wha 'll buy caller herrin'? &c.
Neebour wives, now tent my tellin',
When the bonny fish ye 're sellin',
At ae word be in yer dealin'—
Truth will stand when a' thing 's failin'.
Wha 'll buy caller herrin'? &c.
THE LAND O' THE LEAL.[49]
I 'm wearin' awa', John,
Like snaw wreaths in thaw, John;
I 'm wearin' awa'
To the land o' the leal.
There 's nae sorrow there, John;
There 's neither cauld nor care, John;
The day 's aye fair
I' the land o' the leal.
Our bonnie bairn 's there, John;
She was baith gude and fair, John;
And, oh! we grudged her sair
To the land o' the leal.
But sorrows sel' wears past, John,
And joy 's a-comin' fast, John—
The joy that 's aye to last
In the land o' the leal.
Sae dear 's that joy was bought, John,
Sae free the battle fought, John,
That sinfu' man e'er brought
To the land o' the leal.
Oh, dry your glist'ning e'e, John!
My saul langs to be free, John;
And angels beckon me
To the land o' the leal.
Oh, haud ye leal and true, John!
Your day it 's wearin' thro', John;
And I 'll welcome you
To the land o' the leal.
Now, fare ye weel, my ain John,
This warld's cares are vain, John;
We 'll meet, and we 'll be fain,
In the land o' the leal.