KIND ROBIN LOE'S ME.[52]
Robin is my ain gudeman,
Now match him, carlins, gin ye can,
For ilk ane whitest thinks her swan,
But kind Robin lo'es me.
To mak my boast I 'll e'en be bauld,
For Robin lo'ed me young and auld,
In summer's heat and winter's cauld,
My kind Robin lo'es me.
Robin he comes hame at e'en
Wi' pleasure glancin' in his e'en;
He tells me a' he 's heard and seen,
And syne how he lo'es me.
There 's some hae land, and some hae gowd,
Mair wad hae them gin they could,
But a' I wish o' warld's guid,
Is Robin still to lo'e me.
KITTY REID'S HOUSE.
Air—"Country Bumpkin."
Hech, hey! the mirth that was there,
The mirth that was there,
The mirth that was there;
Hech, how! the mirth that was there,
In Kitty Reid's house on the green, Jo!
There was laughin' and singin', and dancin' and glee,
In Kitty's Reid's house, in Kitty Reid's house,
There was laughin' and singin', and dancin' and glee,
In Kitty Reid's house on the green, Jo!
Hech, hey! the fright that was there,
The fright that was there,
The fright that was there;
Hech, how! the fright that was there,
In Kitty Reid's house on the green, Jo!
The light glimmer'd in through a crack i' the wa',
An' a'body thocht the lift it wad fa',
And lads and lasses they soon ran awa'
Frae Kitty's Reid's house on the green, Jo!
Hech, hey! the dule that was there,
The dule that was there,
The dule that was there;
The birds and beasts it wauken'd them a',
In Kitty Reid's house on the green, Jo!
The wa' gaed a hurley, and scatter'd them a',
The piper, the fiddler, auld Kitty, and a';
The kye fell a routin', the cocks they did craw,
In Kitty Reid's house on the green, Jo!