Bonnie Charlie 's now awa',
Safely ower the friendly main;
Mony a heart will break in twa
Should he ne'er come back again.
Will ye no come back again?
Will ye no come back again?
Better lo'ed ye canna be—
Will ye no come back again?
Ye trusted in your Hieland men,
They trusted you, dear Charlie!
They kent your hiding in the glen,
Death or exile braving.
Will ye no, &c.
English bribes were a' in vain,
Tho' puir, and puirer, we maun be;
Siller canna buy the heart
That beats aye for thine and thee.
Will ye no, &c.
We watch'd thee in the gloamin' hour,
We watch'd thee in the mornin' gray;
Though thirty thousand pound they gi'e,
Oh, there is none that wad betray!
Will ye no, &c.
Sweet 's the laverock's note, and lang,
Lilting wildly up the glen;
But aye to me he sings ae sang,
Will ye no come back again?
Will ye no, &c.
JAMIE THE LAIRD.
Air—"The Rock and the Wee Pickle Tow."
Send a horse to the water, ye 'll no mak him drink,
Send a fule to the college, ye 'll no mak him think;
Send a craw to the singin', an' still he will craw,
An' the wee laird had nae rummulgumshion ava.
Yet is he the pride o' his fond mother's e'e,
In body or mind, nae fau't can she see;
"He 's a fell clever lad, an' a bonny wee man,"
Is aye the beginnin' an' end o' her sang.
An' oh! she 's a haverin' lucky, I trow,
An' oh! she 's a haverin' lucky, I trow;
"He 's a fell clever lad, an' a bonny wee man,"
Is aye the beginnin' an' end o' her sang.
His legs they are bow'd, his een they do glee,
His wig, whiles it 's aff, and when on, it 's ajee;
He 's braid as he 's lang, an' ill-faur'd is he,
A dafter-like body I never did see.
An' yet for this cratur' she says I am deein',
When that I deny, she 's fear'd at my leein';
Obliged to put up wi' this sair defamation,
I'm liken to dee wi' grief an' vexation.
An' oh! she 's a haverin' lucky, &c.