Air—"Paddy's Wedding."
I lately lived in quiet ease,
An' never wish'd to marry, O!
But when I saw my Peggy's face,
I felt a sad quandary, O!
Though wild as ony Athol deer,
She has trepann'd me fairly, O!
Her cherry cheeks an' e'en sae clear
Torment me late an' early, O!
O, love, love, love!
Love is like a dizziness,
It winna let a poor body
Gang about his business!
To tell my feats this single week,
Would mak' a daft-like diary, O!
I drave my cart outow'r a dike,
My horses in a miry, O!
I wear my stockings white an' blue,
My love 's sae fierce an' fiery, O!
I drill the land that I should plough,
An' plough the drills entirely, O!
O, love, love, love! &c.
Ae morning, by the dawn o' day,
I rose to theek the stable, O!
I keust my coat an' plied away
As fast as I was able, O!
I wrought that morning out an' out,
As I 'd been redding fire, O!
When I had done an' look'd about,
Gude faith, it was the byre, O!
O, love, love, love! &c.
Her wily glance I 'll ne'er forget,
The dear, the lovely blinkin' o't
Has pierced me through an' through the heart,
An' plagues me wi' the prinklin' o't.
I tried to sing, I tried to pray,
I tried to drown 't wi' drinkin' o't,
I tried wi' sport to drive 't away,
But ne'er can sleep for thinkin' o't.
O, love, love, love! &c.
Nae man can tell what pains I prove,
Or how severe my pliskie, O!
I swear I 'm sairer drunk wi' love
Than e'er I was wi' whisky, O!
For love has raked me fore an' aft,
I scarce can lift a leggie, O!
I first grew dizzy, then gaed daft,
An' soon I 'll dee for Peggy, O!
O, love, love, love!
Love is like a dizziness,
It winna let a poor body
Gang about his business!
O, WEEL BEFA' THE MAIDEN GAY.[58]
O, weel befa' the maiden gay,
In cottage, bught, or penn,
An' weel befa' the bonny May
That wons in yonder glen;
Wha loes the modest truth sae weel,
Wha 's aye kind, an' aye sae leal,
An' pure as blooming asphodel
Amang sae mony men.
O, weel befa' the bonny thing
That wons in yonder glen!
'Tis sweet to hear the music float
Along the gloaming lea;
'Tis sweet to hear the blackbird's note
Come pealing frae the tree;
To see the lambkins lightsome race—
The speckled kid in wanton chase—
The young deer cower in lonely place,
Deep in her flowing den;
But sweeter far the bonny face
That smiles in yonder glen!