CHEESE AND WHISKY.
Tune—"The gude forgi' me for leein'."
Believe me or doubt me, I dinna care whilk,
When Bachelor Willie I 'm seeing,
I feast upon whisky, and cheese o' ewe milk,
And ne'er was choked for leeing, for leeing,
And ne'er was choked for leeing.
Your jams and your jellies, your sugars and teas,
If e'er I thought worthy the preeing,
Compared wi' gude whisky, and kebbocks o' cheese,
May I sup porridge for leeing, for leeing,
May I sup porridge for leeing.
When patfou's o' kale, thick wi' barley and pease,
Can as weel keep a body frae deeing,
As stoupfou's o' whisky, and platefou's o' cheese,
I 'll dree to be scrimpit for leeing, for leeing,
I 'll dree to be scrimpit for leeing.
Tho' the house where we 're sittin' were a' in a bleeze,
I never could think about fleeing,
But would guzzle the whisky, and rive at the cheese;
Perhaps ye may think that I 'm leeing, I 'm leeing,
Perhaps ye may think that I 'm leeing.
THE BURN TROUT.
Tune—"The gude forgi' me for leein'."
Brither Jamie cam west, wi' a braw burn trout,
An' speer'd how acquaintance were greeing;
He brought it frae Peebles, tied up in a clout,
An' said it wad just be a preeing, a preeing,
An' said it wad just be a preeing.