Tune—"Roy's Wife o' Aldivalloch."
Fife, an' a' the land about it,
Fife, an' a' the land about it;
May health, an' peace, an' plenty glad,
Fair Fife, an' a' the land about it.
We 'll raise the song on highest key,
Through every grove till echo shout it;
The sweet enchantin' theme shall be,
Fair Fife, an' a' the land about it.
Fife, an' a' the land about it, &c.
Her braid an' lang extended vales
Are clad wi' corn, a' wavin' yellow;
Her flocks an' herds crown a' her hills;
Her woods resound wi' music mellow.
Fife, an' a' the land about it, &c.
Her waters pastime sweet afford
To ane an' a' wha like to angle;
The seats o' mony a laird an' lord,
Her plains, as stars the sky, bespangle.
Fife, an' a' the land about it, &c.
In ilka town an' village gay,
Hark! Thrift, her wheel an' loom are usin';
While to an' frae each port an' bay,
See wealthy Commerce briskly cruisin'.
Fife, an' a' the land about it, &c.
Her maids are frugal, modest, fair,
As lilies by her burnies growin';
An' ilka swain may here repair,
Whase heart wi' virt'ous love is glowin'.
Fife, an' a' the land about it, &c.
In peace, her sons like lammies mild,
Are lightsome, friendly, an' engagin';
In war, they 're loyal, bauld, an' wild,
As lions roused, an' fiercely ragin'.
Fife, an' a' the land about it, &c.
May auld an' young hae meat an' claes;
May wark an' wages aye be plenty;
An' may the sun to latest days
See Fife an' a' her bairnies canty.
Fife, an' a' the land about it,
Fife, an' a' the land about it;
May health, an' peace, an' plenty glad,
Fair Fife, an' a' the land about it.