GLOOMY WINTER 'S NOW AWA'.
Air—"Lord Balgonie's Favourite."
Gloomy winter 's now awa'
Saft the westling breezes blaw,
'Mang the birks of Stanley-shaw,
The mavis sings fu' cheery, O!
Sweet the crawflower's early bell
Decks Gleniffer's dewy dell,
Blooming like thy bonny sel',
My young, my artless dearie, O!
Come, my lassie, let us stray
O'er Glenkilloch's sunny brae,
Blithely spend the gowden day,
'Midst joys that never weary, O!
Towering o'er the Newton woods,
Laverocks fan the snaw-white clouds,
Siller saughs, wi' downy buds,
Adorn the banks sae briery, O!
Round the sylvan fairy nooks,
Feath'ry breckans fringe the rocks,
'Neath the brae the burnie jouks,
And ilka thing is cheery, O!
Trees may bud, and birds may sing,
Flowers may bloom, and verdure spring,
Joy to me they canna bring,
Unless wi' thee, my dearie, O!
O! ARE YE SLEEPING, MAGGIE?
Air—"Sleepy Maggie."
O! Are ye sleeping, Maggie?
O! are ye sleeping, Maggie?
Let me in, for loud the linn
Is roaring o'er the warlock craigie.
Mirk and rainy is the night,
No a starn in a' the carry;[84]
Lightnings gleam athwart the lift,
And winds drive wi' winter's fury.
O! are ye sleeping, Maggie? &c.