The ringlets, my lovely young Betty,
That wave o'er thy bonnie e'ebree,
I 'll twine wi' the flowers o' the mountain,
That blossom sae sweetly, like thee.
Then come o'er the burn, my sweet Betty,
Come over the burn, love, to me;
O, sweet is the bliss, my dear Betty,
To live in the blink o' thine e'e.
COME AWA, HIE AWA.
Air—"Haud awa frae me, Donald."
Come awa, hie awa,
Come and be mine ain, lassie;
Row thee in my tartan plaid,
An' fear nae wintry rain, lassie.
A gowden brooch, an' siller belt,
Wi' faithfu' heart I 'll gie, lassie,
Gin ye will lea' your Lawland hame,
For Highland hills wi' me, lassie.
Come awa, &c.
A bonnie bower shall be thy hame,
And drest in silken sheen, lassie.
Ye 'll be the fairest in the ha',
And gayest on the green, lassie.
Come awa, &c.
ANSWER.
Haud awa, bide awa,
Haud awa frae me, Donald;
What care I for a' your wealth,
And a' that ye can gie, Donald?
I wadna lea' my Lowland lad
For a' your gowd and gear, Donald;
Sae tak' your plaid, an' o'er the hill,
An' stay nae langer here, Donald.
Haud awa, &c.
My Jamie is a gallant youth,
I lo'e but him alane, Donald,
And in bonnie Scotland's isle,
Like him there is nane, Donald;
Haud awa, &c.