Hark ye, I gaed up to meet her;
But whane'er my face she saw,
Up her plaidin' coat she kiltit,
And in daffin' scour'd awa'.
Weel kent I that though my Peggie
Ran sae fast out owre the mead,
She was wantin' me to follow—
Yes, ye swains, an' sae I did.
At yon burnie I o'ertook her,
Whare the shinin' pebbles lie;
Whare the flowers, that fringe the border,
Soup the stream, that wimples by.
While wi' her I sat reclinin',
Frae her lips I staw a kiss;
While she blush'd, I took anither,—
Shepherds, was there ill in this?
Could a lass, sae sweet an' comely,
Ever bless a lover's arms?
Could the bonnie wife o' Vulcan
Ever boast o' hauf the charms?
While the zephyrs fan the meadows,
While the flow'rets crown the lea,
While they paint the gowden simmer,
Wha sae blest as her an' me?
WOO ME AGAIN.
Tune—"On a Primrosy Bank."
Whan Jamie first woo'd me, he was but a youth:
Frae his lips flow'd the strains o' persuasion and truth;
His suit I rejected wi' pride an' disdain,
But, oh! wad he offer to woo me again!
He aft wad hae tauld me his love was sincere,
And e'en wad hae ventured to ca' me his dear:
My heart to his tale was as hard as a stane;
But, oh! wad he offer to woo me again!
He said that he hoped I would yield an' be kind,
But I counted his proffers as light as the wind;
I laugh'd at his grief, whan I heard him complain;
But, oh! wad he offer to woo me again!
He flatter'd my locks, that war black as a slae,
And praised my fine shape, frae the tap to the tae;
I flate, an' desired he wad let me alane;
But, oh! wad he offer to woo me again!