THE BRAES OF GALLOWAY.
Tune—"White Cockade."
O lassie, wilt thou gang wi' me,
And leave thy friens i' th' south countrie—
Thy former friens and sweethearts a',
And gang wi' me to Gallowa'?
O Gallowa' braes they wave wi' broom,
And heather-bells in bonnie bloom;
There 's lordly seats, and livins braw,
Amang the braes o' Gallowa'!
There 's stately woods on mony a brae,
Where burns and birds in concert play;
The waukrife echo answers a',
Amang the braes o' Gallowa'.
O Gallowa' braes, &c.
The simmer shiel I 'll build for thee
Alang the bonnie banks o' Dee,
Half circlin' roun' my father's ha',
Amang the braes o' Gallowa'.
O Gallowa' braes, &c.
When autumn waves her flowin' horn,
And fields o' gowden grain are shorn,
I 'll busk thee fine, in pearlins braw,
To join the dance in Gallowa'.
O Gallowa' braes, &c.
At e'en, whan darkness shrouds the sight,
And lanely, langsome is the night,
Wi' tentie care my pipes I 'll thraw,
Play "A' the way to Gallowa'."
O Gallowa' braes, &c.
Should fickle fortune on us frown,
Nae lack o' gear our love should drown;
Content should shield our haddin' sma',
Amang the braes o' Gallowa'.
Come while the blossom 's on the broom,
And heather bells sae bonnie bloom;
Come let us be the happiest twa
On a' the braes o' Gallowa'!