Her neck was o' the snaw-drap hue,
Her lips like roses wet wi' dew;
But O! her e'e, o' azure blue,
Was past expression bonnie, O!
Like threads o' gowd her flowin' hair,
That lightly wanton'd wi' the air;
But vain were a' my rhymin' ware
To tell the charms o' Annie, O!
While smilin' in my arms she lay,
She whisperin' in my ear did say,
"Oh, how could I survive the day,
Should you prove fause, my Tammie, O?"
"While spangled fish glide to the main,
While Scotlan's braes shall wave wi' grain,
Till this fond heart shall break wi' pain,
I 'll aye be true to Annie, O!"
The Beltan winds blew loud and lang,
And ripplin' raised the spray alang;
We cheerfu' sat, and cheerfu' sang,
The banks of Tarf are bonnie, O!
Though sweet is spring, whan young and gay,
And blithe the blinks o' summer day;
I fear nae winter cauld and blae,
If blest wi' love and Annie, O!
O! WILL YE GO TO YON BURN SIDE.
Tune—"Will ye walk the woods with me?"
O! will ye go to yon burn side,
Amang the new-made hay;
And sport upon the flowery swaird,
My ain dear May?
The sun blinks blithe on yon burn side,
Whar lambkins lightly play,
The wild bird whistles to his mate,
My ain dear May.
The waving woods, wi' mantle green,
Shall shield us in the bower,
Whare I 'll pu' a posy for my May,
O' mony a bonnie flower.
My father maws ayont the burn,
My mammy spins at hame;
And should they see thee here wi' me,
I 'd better been my lane.
The lightsome lammie little kens
What troubles it await—
Whan ance the flush o' spring is o'er,
The fause bird lea'es its mate.
The flowers will fade, the woods decay,
And lose their bonnie green;
The sun wi' clouds may be o'ercast,
Before that it be e'en.