THEY SPEAK O' WILES.
Air—"Gin a bodie meet a bodie."
They speak o' wiles in woman's smiles,
An' ruin in her e'e;
I ken they bring a pang at whiles
That 's unco sair to dree;
But mind ye this, the half-ta'en kiss,
The first fond fa'in' tear,
Is, heaven kens, fu' sweet amends,
An' tints o' heaven here.
When two leal hearts in fondness meet,
Life's tempests howl in vain;
The very tears o' love are sweet
When paid with tears again.
Shall hapless prudence shake its pow,
Shall cauldrife caution fear,
Oh, dinna, dinna droun the lowe,
That lichts a heaven here!
What though we 're ca'd a wee before
The stale "three score an' ten,"
When Joy keeks kindly at your door,
Aye bid her welcome ben.
About yon blissfu' bowers above
Let doubtfu' mortals speir;
Sae weel ken we that "heaven is love,"
Since love makes heaven here.
THE MITHERLESS BAIRN.[30]
When a' ither bairnies are hush'd to their hame
By aunty, or cousin, or frecky grand-dame,
Wha stands last and lanely, an' naebody carin'?
'Tis the puir doited loonie—the mitherless bairn!
The mitherless bairn gangs to his lane bed,
Nane covers his cauld back, or haps his bare head;
His wee hackit heelies are hard as the airn,
An' litheless the lair o' the mitherless bairn.