The corncraik was chirming
His sad eerie cry,
And the wee stars were dreaming
Their path through the sky;
The burn babbled freely
Its love to ilk flower,
But we heard and we saw nought
In that blessed hour.
We heard and we saw nought,
Above or around;
We felt that our luve lived,
And loathed idle sound.
I gazed on your sweet face
Till tears fill'd my e'e,
And they drapt on your wee loof—
A warld's wealth to me.
Now the winter snaw 's fa'ing
On bare holm and lea,
And the cauld wind is strippin'
Ilk leaf aff the tree.
But the snaw fa's not faster,
Nor leaf disna part
Sae sune frae the bough, as
Faith fades in your heart.
You 've waled out anither
Your bridegroom to be;
But can his heart luve sae
As mine luvit thee?
Ye 'll get biggings and mailins,
And mony braw claes;
But they a' winna buy back
The peace o' past days.
Fareweel, and for ever,
My first luve and last;
May thy joys be to come—
Mine live in the past.
In sorrow and sadness
This hour fa's on me;
But light, as thy luve, may
It fleet over thee!
WAE BE TO THE ORDERS.
Oh! wae be to the orders that march'd my luve awa',
And wae be to the cruel cause that gars my tears down fa',
Oh! wae be to the bluidy wars in Hie Germanie,
For they hae ta'en my luve, and left a broken heart to me.
The drums beat in the mornin', afore the screich o' day,
And the wee, wee fifes play'd loud and shrill, while yet the morn was gray;
The bonnie flags were a' unfurl'd, a gallant sight to see,
But waes me for my sodger lad that march'd to Germanie.
Oh! lang, lang is the travel to the bonnie Pier o' Leith,
Oh! dreich it is to gang on foot wi' the snaw drift in the teeth!
And oh, the cauld wind froze the tear that gather'd in my e'e,
When I gaed there to see my luve embark for Germanie.