YE NEEDNA' BE COURTIN' AT ME.
Air—"John Todd."
"Ye needna' be courtin' at me, auld man,
Ye needna' be courtin' at me;
Ye 're threescore an' three, an' ye 're blin' o' an e'e,
Sae ye needna' be courtin' at me, auld man,
Ye needna' be courtin' at me.
"Stan' aff, noo, an' just lat me be, auld man,
Stan' aff, noo, an' just lat me be;
Ye 're auld an' ye 're cauld, an' ye 're blin' an' ye 're bald,
An' ye 're nae for a lassie like me, auld man,
Ye 're nae for a lassie like me."
"Ha'e patience, an' hear me a wee, sweet lass,
Ha'e patience, an' hear me a wee;
I 've gowpens o' gowd, an' an aumry weel stow'd,
An' a heart that lo'es nane but thee, sweet lass,
A heart that lo'es nane but thee.
"I 'll busk you as braw as a queen, sweet lass,
I 'll busk you as braw as a queen;
I 've guineas to spare, an', hark ye, what 's mair,
I 'm only twa score an' fifteen, sweet lass,
Only twa score an' fifteen."
"Gae hame to your gowd an' your gear, auld man,
Gae hame to your gowd an' your gear;
There 's a laddie I ken has a heart like mine ain,
An' to me he shall ever be dear, auld man,
To me he shall ever be dear.
"Get aff, noo, an' fash me nae mair, auld man,
Get aff, noo, an' fash me nae mair;
There 's a something in love that your gowd canna move—
I 'll be Johnie's although I gang bare, auld man,
I 'll be Johnie's although I gang bare."