"Hech, Tibby, lass! a' yon braid acres o' land,
Wi' ripe craps that wave bonnilie,
An' meikle mair gear shall be at yer command,
Gin' ye will look kindly on me.
"Yon herd o' fat owsen that rout i' the glen,
Sax naigies that nibble the lea;
The kye i' the sheugh, and the sheep i' the pen,
I'se gie a', dear Tibby, to thee.
"An', lassie, I've goupins o' gowd in a stockin',
An' pearlin's wad dazzle yer e'e;
A mettl'd, but canny young yaud, for the yokin',
When ye wad gae jauntin' wi' me.
"I 'll hap ye, and fend ye, and busk ye, and tend ye,
And mak' ye the licht o' my e'e;
I 'll comfort and cheer ye, and daut ye and dear ye,
As couthy as couthy can be.
"I 've lo'ed ye, dear lassie, since first, a bit bairn,
Ye ran up the knowe to meet me;
An' deckit my bonnet wi' blue bells an' fern,
Wi' meikle glad laughin' an' glee.
"An' noo woman grown, an' mensefu', an' fair,
An' gracefu' as gracefu' can be—
Will ye tak' an' auld carle wha ne'er had a care
For woman, dear Tibby, but thee?"
Sae, Aunty, ye see I 'm a' in a swither,
What answer the bodie to gie—
But aften I wish he wad tak' my auld mither,
And let puir young Tibby abee.
JEAN LINN.
Oh, haud na' yer noddle sae hie, ma doo!
Oh, haud na' yer noddle sae hie!
The days that hae been, may be yet again seen,
Sae look na sae lightly on me, ma doo!
Sae look na' sae lightly on me!