Her lip is o' the rose's hue,
Like links o' goud her hair,
Her e'e is o' the azure blue,
An' love beams ever there;
Her step is like the mountain goat's
That climbs the stately Ben,
Her voice sweet as the mavis' notes
That haunt her native glen.
There is a sweet wee hazel bower
Where woodbine blossoms twine,
There Jeanie, ae auspicious hour,
Consented to be mine;
An' there we meet whene'er we hae
An idle hour to spen',
An' Jeanie ne'er has rued the day
She met me in the glen.
Oh bricht, bricht are the evenin' beams,
An' sweet the pearly dew,
An' lovely is the star that gleams
In gloamin's dusky brow;
But brichter, sweeter, lovelier far,
Aboon a' human ken,
Is my sweet pearl—my lovely star—
My Jeanie o' the glen.
JOHN HUNTER.
The following compositions are, with permission, transcribed from a small volume of juvenile poems, with the title "Miscellanies, by N. R.," which was printed many years ago, for private circulation only, by Mr John Hunter, now auditor of the Court of Session.
THE BOWER O' CLYDE.
On fair Clydeside thair wonnit ane dame,
Ane dame of wondrous courtesie,
An' bonny was the kindly flame
That stremit frae her saft blue e'e.
Her saft blue e'e, 'mid the hinney dew,
That meltit to its tender licht,
Was bonnier far than the purest starre
That sails thro' the dark blue hevin at nicht.