III
‘Eneugh ye hae o’ gude wheat bread,
And eneugh o’ the blude-red wine;
And therefore for nae venison, Johnnie,
I pray ye, stir frae hame.
IV
‘There are Seven For’sters at Hislinton side,
At Hislinton where they dwell,
And for ae drap o’ thy heart’s blude
They wad ride the fords o’ hell.’
V
But Johnnie has buskit his gude bend-bow,
His arrows, ane by ane,
And he has gane to Durrisdeer
To ding the dun deer down.
VI
He’s lookit east, and he’s lookit west,
And a little below the sun;
And there he spied the dun deer lying
Aneath a buss[1159] o’ broom.
VII
Johnnie he shot and the dun deer lap[1160],
And he wounded her on the side;
But atween the wood and the wan water
His hounds they laid her pride.