III
‘O fare ye weel, my lady gay!
O fare ye weel, my Sarah!
For I maun gae, tho’ I ne’er return
Frae the dowie banks o’ Yarrow.’
IV
She kiss’d his cheek, she kamed his hair,
As she had done before, O;
She belted on his noble brand,
An’ he’s awa to Yarrow.
V
O he’s gane up yon high, high hill—
I wat he gaed wi’ sorrow—
An’ in a den spied nine arm’d men,
I’ the dowie houms o’ Yarrow.
VI
‘O are ye come to drink the wine,
As ye hae doon before, O?
Or are ye come to wield the brand,
On the dowie houms o’ Yarrow?’—
VII
‘I am no come to drink the wine,
As I hae done before, O,
But I am come to wield the brand,
On the dowie houms o’ Yarrow.’