III
‘O Coo-me-doo, my love sae true,
If ye’ll come doun to me,
Ye’se hae a cage o’ gude red gowd
Instead o’ simple tree.
IV
‘I’ll put gowd hingers[215] roun’ your cage,
And siller roun’ your wa’;
I’ll gar ye shine as fair a bird
As ony o’ them a’.’
V
But she had nae these words well spoke,
Nor yet these words well said,
Till Coo-me-doo flew frae the tower
And lichted on her head.
VI
Then she has brought this pretty bird
Hame to her bowers and ha’,
And made him shine as fair a bird
As ony o’ them a’.
VII
When day was gone, and night was come,
About the evening-tide,
This lady spied a gallant youth
Stand straight up by her side.