XIII

Then he is on to Margaret’s bour,
And tirlèd at the pin;
But doors were steek’d and windows barr’d,
And nane wad let him in.

XIV

‘O open the door to me, Marg’ret!
O open and let me in!
For my boots are fu’ o’ Clyde’s water
And the rain rins owre my chin.’—

XV

‘I darena open the door to you,
Nor darena let you in;
For my mither she is fast asleep,
And I maun mak’ nae din.’—

XVI

‘O hae ye ne’er a stable?’ he says,
‘Or hae ye ne’er a barn?
Or hae ye ne’er a wild-goose house
Where I might rest till morn?’—

XVII

‘My barn it is fu’ o’ corn,’ she says,
‘My stable is fu’ o’ hay;
My house is fu’ o’ merry young men;
They winna remove till day.’—