II. The Return
‘MAK ready, mak ready, my merry men a’;
Our gude ship sails the morn.’
‘Now ever alack, my master dear,
I fear a deadly storm.
‘I saw the new moon late yestreen
Wi’ the auld moon in her arm;
And if we gang to sea, master,
I fear we’ll come to harm.’
They hadna sail’d a league, a league,
A league but barely three,
When the lift grew dark, and the wind blew loud,
And gurly grew the sea.
The ankers brak, and the topmast lap,
It was sic a deadly storm:
And the waves cam owre the broken ship
Till a’ her sides were torn.
lift] sky. lap] sprang.
‘GO fetch a web o’ the silken claith,
Another o’ the twine,
And wap them into our ship’s side,
And let nae the sea come in.’
They fetch’d a web o’ the silken claith,
Another o’ the twine,
And they wapp’d them round that gude ship’s side,
But still the sea came in.
O laith, laith were our gude Scots lords
To wet their cork-heel’d shoon;
But lang or a’ the play was play’d
They wat their hats aboon.