Item, the prisonynge of Dallynge, and of hese obligacion mad to Sir Thomas Todenham, and howe he was presonyd at Norwyche, at Thetforthe, at Lynne, and also of many other that ben don soo too.
Item, to remembre T. Denyes of the tale that Fyncheham told whan he cam hom for Sir T. Todeham, that he be ware therof, &c.
Item, for to indyte Pryntys of a voluntary eschete that where on Symond Hamond of Patesle wheche was indyted of felonye, and because of hese goods he lete hym owte of the castell anno xvjº Regis nunc.
Item, for to indyte the same Prentys and William Goodwen of Swafham for the robbynge of Geffrey Sowle.
Item, the same Prentys and Goodwyn robbed Thomas Irynge of Myleham anno xxº Regis nunc.
Item, the same Prentys toke of Wylliam Dallynge at Norwyche v. mark for smytynge of of hese feteris whan he was there in preson anno xixº Regis nunc.
Item, to indyte the baly of Swaffham, T. Todenham, Heydon, Prentys, of felonye as excercarys [accessaries].
Item, to speke to Feraris for hese mater at Thyrnyng. Item, to indyte a cowper at Geyton wheche slow a tenaunt of Danyell at Geyton. Hese name is Thomas Dowce that was slayn; and ther kan no man indyte hym, for Sir T. Todenham maynteynyth hym, and therfore he were worthy to be indyted as excercary, anno xxvº Regis nunc.
Item, to indyte Heydon, because he rydyth armyd ayens the statute and the commyssion of the peas.
Item, for takyng awey of John of Berneys haborjoun at Walsyngham.