In primis, on the Monday[309.1] next before Ester day and the shire daye, the xxx. yere of oure soverayne Lord the Kyng, x. persons of the sayd riottors, with a brother of the wyff of the sayd Robert Lethum, laye in awayte in the hyght way under Thorpe Wode upon Phillip Berney, esquyer, and his man comyng from the shire, and shette atte hym and smote the hors of the sayd Phillipp with arowes, and than over rode hym, and toke hym and bette hym and spoillid hym. And for thayr excuse of this ryot, they ledde hym to the Bysshopp of Norwiche, axyng seuerte of the peas wher they hadde never waraunt hym to areste. Which affray shorttyd the lyffdayes of the sayd Phillippe, whiche dyed withynne shorte tyme after the said affray.[309.2]
Item, iij. of the sayd riottys feloshippe the same day, yere, and place, laye on awayte uppon Edmond Broune, gentilman, and with naked swerdes and other wepyng faght wyth hym be the space of on qaurte (sic) of an houre, and toke and spoillyd hym, and kepte hym as long as them lyst, and after that lette hym goo.
Item, xlti of the sayd riottys felowshipp, be the comaundement of the same Robert Lethum, jakket and saletted, with bowes, arowys, billys, and gleyves, oppon Mauyndy Thursday,[309.3] atte iiij. of the clokke atte after nonne, the same yere, comyn to the White Freres in Norwyche, and wold have brokyn theyr yates and dorys, feynyng thaym that they wold hire thayre evesong. Where they ware aunswered suche service was non used to be there, nor withyn the sayd citee atte that tyme of the daye, and prayd them to departe; and they aunswered and sayd that affore thayre departyng they wold have somme persons ouute of that place, qwykke or dede, insomuch the sayd freris were fayn to kype thaire place with forsse. And the mayr and the sheriffe of the sayd cite were fayn to arere a power to resyst the sayd riotts, which to hem on that holy tyme was tediose and heynous, consedryng the losse and lettyng of the holy service of that holy nyght. And theroppon the sayd ryotors departid.
Item, the sayd Robert Lethum, on the Monday[310.1] nest after Esterne day, the same yere, toke from on John Wilton iiij. neet for rent arere, as he said, and killed hem and layd them in salte, and afterward ete hem.
Item, the sayd Robert Lethum, with vj. of his sayd ryottes, the same yere made assaute uppon John Wilton in Plumstede churche yerde, and theer so bete hym that he was in doute of his lyff; and also dede to hym many grete wronggys and oppressioun, unto the undoyng of the sayd John Wilton.
Item, in lyke wyse the sayd Robert Lethum and his men assauted on John Coke of Witton, in brekyng uppe his dorys atte a xi. of the cloke in the nyght, and wyth thaire swerdys maymed hym and gaff hym vij. grete wondys, and toke from hym certayn goodys and catalls, of the whiche he hadde, nor yitte hath, no remedy nor restitution.
Item, the same day and yere they bete the moder of the same John Coke, she beyng iiijxx. [four score] yere of age and more, and smote hure uppon the crowne of here hed with a swerd; of the whiche hurte she myght never be helyd into the day of hure deth.
Item, John, the sone of Hodge Ratleffe, and other of the sayd felowshipp, toke on Thomas Baret of Byrlygham out of his house, and bete hym and wondid hym that he kept his bedde a month, and toke from hym certayn goodes and catells.
Item, the sayd Robert Taillor, because the sayd Thomas Baret complayned of the same betyng, lay in awayte oppon hym, with other of his feloushippe, and bete hym agayn.
Item, John Beston and the sayd Robert Taillor, and other of the sayd riottes felowshipp, toke on Thomas Byrden of Lyngewod and bete hym and prisoned hym till unto such tyme that he was delyvered by the mene of my Lord of Norwych; and for that sorow, distres, and grete payne and betyng, the sayd Thomas Byrden toke suche kynesse that he dyed.